Programa das XXVII Xornadas AGAMFeC de Medicina Familiar e Comunitaria

Estimados colegas e amigos da Medicina Familiar e Comunitaria,

É un pracer convidarvos ás XXVII Xornadas AGAMFEC, que se celebrarán en Lugo os días 14 e 15 de marzo de 2025 baixo o lema “Alén da Consulta”. Despois de moitos anos, volvemos á cidade amurallada para compartir coñecementos e experiencias no ámbito da Atención Primaria. Inicialmente previstas para setembro de 2024, tivemos que adiar as datas a marzo de 2025. A pesar deste cambio, o comité organizador traballou con gran dedicación e esforzo para crear un programa de alta calidade, centrado nas necesidades e desafíos actuais da Atención Primaria.

As xornadas ofrecerán unha ampla gama de actividades, incluíndo conferencias, obradoiros prácticos e mesas redondas, todas elas deseñadas para fortalecer as nosas competencias como médicos de familia. Abordaremos temas cruciais como o uso da antibioterapia, ecografía clínica ou actualización en cardiovascular.

O noso lema “Alén da Consulta” reflicte a esencia da Medicina Familiar e Comunitaria actual. Do mesmo xeito que acompañamos aos nosos pacientes máis alá das catro paredes da consulta, estas xornadas pretenden expandir os nosos horizontes profesionais. Exploraremos como podemos mellorar a atención integral, considerando os aspectos sociais, familiares e comunitarios que inflúen na saúde dos nosos pacientes, e como podemos ser axentes de cambio nas nosas comunidades. Para isto, contaremos con obradoiros organizados polo grupo de PACAP e InIquidades, así como obradoiros de investigación e mesas sobre a presenza da medicina de familia na universidade.

Animámosvos encarecidamente a participar activamente nestas xornadas. A vosa presenza e contribucións son fundamentais para o éxito deste evento e para o continuo desenvolvemento da nosa especialidade. Ademais, será unha excelente oportunidade para reconectar con colegas e gozar da rica cultura e gastronomía de Lugo.

Agardámosvos en Lugo, no Vello Cárcere, para ir “Alén da Consulta” xuntos!

Noemí López Rey

Presidenta do Comité Organizador das XXVII Xornadas AGAMFEC

Xosé Anxo Fariñas

Presidente do Comité Científico das XXVII Xornadas AGAMFEC

Consulta o programa e o formulario de inscrición na Web das XXVII Xornadas AGAMFEC