Comunicado sobre o estudo de seroprevalencia

0 510

A Asociación Galega de Medicina Familiar e Comunitaria (Agamfec), sociedade científica que agrupa a máis de mil médicos de familia galegos, vén de comprobar que a Consellería de Sanidade se empecina en continuar co absurdo e pouco transparente estudo de seroprevalencia. Dende o punto de vista de investigación parécenos que non cumpre as normas básicas de consentimento informado nin de transparencia na súa metodoloxía e deseño.

Neste sentido, dende a Xunta Directiva de Agamfec imos pedir ao Comité Ético de Investigación Clínica de Galicia que se pronuncie sobre este aspecto. Se hai alguén na Consellería necesitado de agrandar o seu currículo investigador, que o faga co seu traballo. Porque este despropósito está a complicar a actividade asistencial de miles de enfermeiras na nosa comunidade autónoma, nestes momentos nos que é fundamental aproveitar os recursos para detectar os brotes de casos e para reforzar á desatendida poboación de doentes crónicos que durante o confinamento tiveron toda clase de complicacións e medo de acudir aos centros sanitarios. Xa na primeira ola do estudo comprobouse a baixa seroprevalencia da poboación. O número de casos segue en descenso. Que podemos atopar nunha nova cata? Que conclusións asistenciais e prácticas para a saúde da poboación agardan obter?

Parécenos que só dende unha actitude e intención propagandística se pode entender a continuidade deste estudo absurdo que compromete a desexada reactivación asistencial na Atención Primaria. Sería unha boa noticia desistir de actividades tan pouco útiles nestes momentos e pedimos reconsiderar a súa continuidade. Se non é así teriamos que quedar a espera do pronunciamento do Comité Ético de Investigación Clínica antes de traballar nun proxecto tan discutible no seu obxectivo, na súa metodoloxía, na súa oportunidade e de nula utilidade. Os traballadores sanitarios deben ter seguridade e absterse de facer nada contra a deontoloxía e mesmo a racionalidade do emprego dos recursos de tódolos galegos.

Xunta directiva de AGAMFEC

29 de Maio de 2020

 

Deja una respuesta

Su dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.

Emprego de cookies

Este sitio web emprega cookies para que poida disfrutar da mellor experiencia coma usuario. Se vostede continúa navegando, consinte e acepta as mencionadas cookies e a nosa política de cookies, Pinche no enlace para máis información.

ACEPTAR
Aviso de cookies