Con respecto á recente comunicación a residentes e titores acerca de contratos de traballo e xestión de vacacións, dende AGAMFEC gustaríanos recordar o que recolle a normativa:
O residente de 4º ano debe estar capacitado para asumir as funcións propias da especialidade de Medicina Familiar e Comunitaria.
Dita actividade deberá realizarse nos centros de saúde acreditados adxudicados nos que desenvolve a súa formacion .
En todo momento deberá coñecer que profesionais do persoal están presentes na unidade na que o residente está prestando servizos e ten dereito a consultarlles e solicitar o seu apoio cando o considere necesario pola súa condición de especialista en formación e dereito a supervisión.
Ademáis, os Protocolos de Supervisión, que deberían estar elaborados e aprobados polas Comisións de Docencia, deberían reflexar o grado de supervisión que precisan os residentes no seu cuarto ano de formación.
A duración da residencia será a fixada no programa formativo da especialidade e o contrato do residente é incompatible con calquera outra actividade noutros centros sanitarios.
Gustaríanos ademáis recalcar que, como sociedade científica que ten como finalidade o fomento, o desenvolvemento e a promoción da Medicina Familiar e Comunitaria, consideramos un deber inexcusable defender a calidade da formación dos nosos residentes.