Estimados compañeir@s, é un pracer para nós convidarvos ás XXVIII Xornadas AGAMFEC que se celebrarán na Coruña os días 29 e 30 de maio do 2026.

A imaxe escollida para estas xornadas “Os menhires pola paz” do escultor Manolo Paz parécenos moi representativa da cidade e ademais acércanos ao significado que ten ser médic@ de familia. Os menhires evocan a familia, evocan unha comunidade cohesionada e dan sentido de pertenza. A sua presenza modifica a paisaxe, creando unha dinámica propia entre terra, ceo e mar. Do mesmo xeito, a medicina de familia contribúe a cambiar a paisaxe dos pacientes, conversando con eles, coas súas familias e cos profesionais doutras especialidades que interveñen na sua saúde.

“O desafío de seguir coidando” é o lema escollido nesta ocasión, pois é para nós a gran prioridade como médicos de familia, aínda que hoxe en día é todo un desafío levalo adiante coa situación laboral que estamos a vivir.

Coa finalidade de actualizar coñecementos, mellorar as nosas habilidades e achegarnos ás novas realidades sociais que atendemos na consulta a diario, contaremos con obradoiros así como mesas de actualización clínica. Haberá tempo de debate para reflexionar, escoitarnos e pensar cara onde queremos que camiñe a Atención Primaria do futuro. Abordaremos o reto de cómo seguir escoitando e explorando os pacientes en tempos de intelixencia artificial, así como o noso traballo no ámbito rural e na comunidade.

Estas Xornadas son unha boa razón para que médicos e médicas de familia apaixonados pola atención primaria volvamos a estar xuntos.

Agardámosvos na Coruña!

O Comité Organizador e Científico das XXVIII Xornadas AGAMFEC